其後該男子駕着電單車尾隨Toby座駕至銅鑼灣，並在現場守候Toby。半小時後，Toby完成活動折返，該男子上前理論要求賠償，最後報警處理。交通警到場替Toby進行酒精呼氣測試，又向雙方錄取口供，並召救傷車將報稱遭車輛輾傷腳的男子送院檢查。由於要等候傷者驗傷報告，Toby稍後需再到警署助查，據知報稱受傷的男子是輔警。

嚇到想喊

Toby昨晚講述事發經過仍猶有餘悸：「事發後我即時打電話畀爸爸（無綫高層梁家樹），佢冇鬧我，知我已經好驚，否則我肯定會喊，警察錄完口供，我即刻趕入電視城拍新劇《團圓》，依家我心情好忐忑，我覺得冇做錯，真係感覺唔到有車到對方隻腳。事發後我有問對方有冇流血、行唔行到，佢一直喺度等，我做完活動返去攞車都有慰問佢，佢話腳痛，我主動開聲話報警。」