阿Sa與鄭中基（Ronald）爆「分」訊後引起多個傳言，有指Ronald偷嗒「天使」，房間更出現不屬於阿Sa的比堅尼！阿Sa前晚偕梁政珏及陳偉霆等出席電影《美麗密令》感謝宴時，處處維護Ronald，並眼紅紅說：「唉！要講嘅已經講晒，我哋和平分手，唔涉及任何傳聞。佢唔係咁嘅人，我知道（傳聞）都好嬲，已經分手，點解寫咁多嘢傷害我哋？我哋嘅關係冇第三者，好過分！」

對於被指為做天后而飛起Ronald，阿Sa說：「唔想再講呢個話題，我哋唔係同全世界拍拖，所有嘢都係兩個人嘅事，想同佢澄清呢樣嘢，涉及人格問題要澄清！（佢專一？）佢好專一！（性格唔啱分手？）主要係了解過，相處咁多年，中間經歷好多嘢，唔好諗得咁複雜，呢個世界可以好簡單。」她直認感到很煩，問到Ronald是否同樣感困擾，她說：「佢都係，大家係朋友，有聯絡，有和平共識分手。（見面尷尬？）唔會。」

阿Sa與鄭中基相戀六年以來十分甜蜜，可惜未能開花結果。資料圖片

情傷未愈的阿Sa，坦言為失實報道生氣，並感到受傷害。

不後悔認拍拖

阿Sa與鍾欣桐（阿嬌）的演唱會下月開鑼，問到傳聞會否打擊士氣，她說：「唔會畀私人事影響工作，大家唔好再問就OK。」對於被指以「分」訊掩蓋「婚」訊，她說：「分開唔涉及其他揣測，已有十幾個版本。（心痛畀人話？）梗係會受傷，分手已經唔係開心事，仲不停畀人評頭品足。」

阿Sa昨日與吳君如等出席預防子宮頸癌活動時，再強調不再回答，亦不回應是否「冇註冊有行禮」，問到為何不否認，她說：「係我私人事，要講嘅已經講晒。」至於將來結婚會否公開，她說：「呢刻唔想回應任何嘢，以後工作都係咁！」不過，她表示不後悔默認拍拖。另外，對於Ronald緋聞女友Angelababy祝福他們復合，阿Sa只是無奈苦笑。