網上非法下載嘅情況愈來愈嚴重，對歌手嘅唱片銷量真係有好大影響，有時賣到幾千隻已經偷笑！咁啱前幾日，小小So行街嘅時候，撞到剛剛轉咗新唱片公司嘅方皓玟，之前佢豁出去影咗張好大膽嘅全裸照宣傳，身形Fit到連小小So都忍唔住望多幾眼！小小So同方皓玟咁耐冇見，當然問吓佢有咩新動向先得啦！
小小So：轉咗新公司，習唔習慣呀？
方皓玟：好好呀！公司人少少，大家好似一家人咁！
小小So：幾時出新碟先？
方皓玟：講真，依家出碟都唔會好賣得啦！所以我都唔急，而且我發現唔出碟都賣到歌㗎！
小小So：真係？
方皓玟：原來平日派畀電台DJ嘅Single碟都賣得，網上有人放出嚟呀！唔知邊個拎我嘅Single去賣呢？而且仲有幾單成交咗添呀！我都覺得好驚訝，或者我都放幾隻上去賣先得！