陳樂榣08年高調與Gucci亞太區CEO之子潘熾恒相戀10個月，最後因男方一腳踏兩船而分手，傷心欲絕的Alley對愛情大失所望，更一度傳出「轉軚」戀上張繼聰師妹王若琪，加上Freeze多次傳出解散消息，可謂事業愛情兩失意。據知，Alley近日再次闖情關，經朋友介紹認識年輕才俊，她趁工作比較清閒經常約會新歡，日前Alley打扮密實現身波樓，原來她約了一位年輕「勾鼻男」甜蜜篤波，勾鼻男比Alley高半個頭，身穿恤衫西褲加針織外衣，外表斯文有禮。

兩人愈走愈埋，「勾鼻男」更輕拉陳樂榣手臂。

陳樂榣含情狂電「勾鼻男」，言談甚歡。

現場所見，「勾鼻男」球技不錯，幾乎下下中袋，身旁的Alley頓時變小鳥依人，為新歡磨Q棍，擦吓擦吓更愈走愈埋，兩人不時「零距離」咬耳仔談心，認真甜蜜。其後，勾鼻男親自「貼身」傳授Alley篤波秘技，不時伸手輕扶Alley纖腰，又提醒爬上波枱的Alley小心走光，經過一輪大戰，勾鼻男讓半臂刻意輸波，令Alley冧爆甜笑，更舉起勝利手勢影相留念，兩人離開時四目交投，依依不捨。分手後，Alley繼續獨自行街街，途經報攤購買最新推出的日本時裝雜誌，又玩扭蛋機，似乎要預習少奶奶的悠閒生活。

準備升呢入豪門的陳樂榣，Shopping時亦特別爽手。

Alley在街頭扭蛋打發時間。

大手筆狂Shopping

翌日，Alley心情大好「變髮」出動，相約好姊妹何紫綸（Ann Ho）到尖沙咀行街Shopping，期間吸引不少狂風浪蝶喪(目及)，但仍無損兩人的「血拚」心情，笑容滿面睇衫又試鞋，期間Alley睇中幾款貴價高踭鞋，更隨即坐在梳化俯身試鞋，令豐滿上圍幾乎爆衫而出，見Alley出手闊綽，不難令人懷疑她已釣到金龜婿。

兩人手挽一袋二袋戰利品離開商場後，轉場到一家露天餐廳食飯醫肚，見Alley興奮得手舞足蹈，似乎要向好友匯報新戀情，期間有外籍型男上前搭訕，雙方不時掩嘴大笑，未知型男是問Alley攞電話號碼，還是投訴她們笑聲太大呢？