王祖藍雖然淨係拍戲、唱歌、拍劇、做主持已經忙到爆炸，不過近日仲搞埋糖水生意，雖然話佢只係其中一個投資者，但係都想生意愈做愈好㗎！為咗咁，祖藍不惜犧牲休息時間，時不時走去舖頭打個白鴿轉，希望可以利用明星效應催谷生意！
有日祖藍約咗小小So去佢間糖水舖試食兼敍舊，原本傾得鬼咁開心，但唔夠十五分鐘，已經有食客要求同祖藍合照，攰爆嘅祖藍即刻鬼打都冇咁精神咁款，同啲食客傾偈兼影相。祖藍嘅親切表現，令到成間糖水舖嘅群情即時洶湧起上嚟，所有食客爭相上前同祖藍合照，祖藍亦有求必應，走遍舖頭照顧每枱食客嘅所有需要。雖然間糖水舖唔算好大，但祖藍咁樣「親善」都用咗成廿幾分鐘，搞到小小So要呆坐一旁，相比之下好鬼落寞！
不過，有樣嘢好鬼得意，雖然祖藍唔係靚仔，但唔知點解糖水舖裏面所有嘅女士見到佢都雙眼發光，唔單止同佢影相時個樣鬼死咁甜蜜，仲要猛讚祖藍靚仔，咁受異性歡迎，唔怪之得祖藍咁多緋聞啦！