春夏掀起牛仔裝熱潮，圈中女星紛紛以「牛女Look」上陣，可惜設計師阿南表示大熱的「牛牛」色調大多是洗水的淺牛，身材不是太纖瘦的女士難以Carry，不過他大讚A. Lin着得青春可人！
A. Lin 好青春
「知道佢着呢套衫嗰日嘅活動係有『80年代主題』嘅Dress Code，所以佢將淺色牛仔裙着到成個懷舊小公主咁，好青春，係啱佢嘅年齡，而且佢好聰明用粗Belt修飾線條，令比例恰到好處！」
陳慧琳 夠穩陣
「Kelly（陳慧琳）以今年D&G模特兒春裝示範，佢當然可以Carry到同着得好靚，但對佢嚟講就穩陣咗冇驚喜，其實佢可以大膽啲玩Mix and Match，咁着仲凸顯佢自己嘅Style。」
Jessica C. 展春意
「Jessica C.正正展示到今季嘅春裝，短褲又可以騷到長腿，着得好有春天嘅感覺，加上佢有對手套襯托吓，都比較特別。」
諸葛梓岐 求其襯
「佢有模特兒身形雖然係Carry到牛仔褸，但佢咁着就好似求其覺得凍，就是但攞咗件外套，我寧願佢除咗件外套，白色Tee加條牛仔褲仲好。」
Angelababy 着錯褲
「雖然Baby係可以Carry到洗水淺色嘅牛仔褲，但就要留意番個長度，如果佢要襯涼鞋，褲腳應該要吊腳啲，而且係闊身少少嘅喇叭褲型。」