曾多次合作的吳君如與古天樂（古仔），昨日出席古裝喜劇《神奇俠侶》宣傳活動，與多位模特兒着戲服行花生騷，又暢談拍攝心得。提到首日開工即拍床戲一事，古仔笑言君如男友兼監製陳可辛「冇眼睇」，因床戲拍到一半時走人！君如搞笑地指當陳可辛走後，兩人拍得很放、很開心，認真抵死。

橫店取景 親自下廚

事後，君如否認陳可辛當日前來「監場」，因拍攝床戲當日要開鏡拜神，對方才會在場，她說：「第一日開工就要拍床戲，都未混熟，而且仲咁多人喺度！（拍床戲有咩難度動作？）今次我哋角色有特異功能，所以比平常人更高難度。（特別動作？）梗係有！正呀！非普通人方法，又拗腰又掃爛啲杯碟。」

古仔在戲中除了與君如有床戲外，又有不少武打鏡頭。問到拍床戲難還是動作戲難時，古仔笑言各有各辛苦：「床戲係非一般性辛苦，而打戲就因為啲皮做嘅戲服好重，打得好辛苦，連背脊痕都唔到！加上喺橫店拍攝，溫差大好難適應。」君如則指橫店食物較油膩，所以開工頭兩日要親自下廚，令大家甚有口福。

對於日前鄭希怡與田亮等在南京消遣時遇襲，古仔與君如表示雖身在內地拍攝，但有時間便在房休息，不會外出。有傳無綫找君如主持清談節目代替《志雲飯局》，她即作出否認，表示連《星星同學會》亦不會做。另外，古天樂早前應中港城邀請，設計限量慈善相架「kool+」，為「古天樂慈善基金」籌款。