楊穎（Angelababy）貴為潮模，當然走在時代尖端，連出埠工作，亦會無間斷上網緊貼潮流動向，為求方便，Baby仲放棄買手提電腦，改用手機上網，瘋狂程度幾乎「人機合一」，認真誇張！
小小So：你無時無刻玩手機，有冇咁多嘢睇呀?
Baby：梗係有啦！我仲用嚟上網添！出Trip都照上㗎！
小小So：喺外國用手機上網咪好貴？
Baby：都係o架！每日幾十蚊，仲有長途電話費呢，個個月幾千蚊閒閒哋！
小小So：唔肉赤咩？
Baby：哈哈！有次見到對鞋好靚，不過諗諗吓都係冇買，留番啲錢上網囉！
小小So：你真係中晒毒……
Baby：所以供應我嘅網絡商都幾發，人哋幾百蚊一個月，我就幾千甚至一萬蚊都試過！
小小So：如果有朝一日去咗個上唔到網嘅地方你會點？
Baby：我諗我會死囉！哈哈！