周秀娜罰男友跪玻璃
吸金o靚模周秀娜去日本行騷忙到癲,男友陳偉成(Avis)卻被發現背住她在泰國攬女,周秀娜知道後震怒不已:「真係有啲咁嘅事?我依家買定玻璃樽,要罰佢跪玻璃。」
解讀:
周秀娜發嬲係人之常情,但係嬲到要男朋友跪玻璃都係第一次聽,如果Avis真係咁勁跪到玻璃,佢可以去東華表演籌款!
陸永有少少興奮
對於陳志雲被捕,農夫強調只見過陳志雲三次,更不是對方的寵兒,問到怕不怕被廉署要求協助調查?風趣的陸永說:「如果係都有少少興奮,呢個係人生經歷,見吓世面囉!協助調查都幾得意!」
解讀:
原來對陸永嚟講協助調查係一件可以「見吓世面」嘅事!其實仲有好多政府部門都會搵人問話,佢咁想增加「人生經歷」,可以去問吓!
麥玲玲肥頭耷耳實冇事
陳志雲涉貪污案,麥玲玲大為驚訝,除了分析陳總的流年運程,她亦向另一涉案的監製錢國偉贈言:「佢肥頭耷耳應該冇事!」
解讀:
麥師傅簡單一句「肥頭耷耳」就道出咗錢國偉嘅命運,睇嚟天下間「肥頭耷耳」嘅人都唔使驚,因為麥師傅話你唔會有事!
黎明突然自封舞台人
「金句王」黎明(Leon)近日又有新搞作,出席宣傳活動時竟然撕爛大會為他準備的「貓紙」,更笑笑口說:「我哋舞台人唔需要呢啲嘢!」嚇得在場人士目瞪口呆。
解讀:
Leon原來除咗拍戲、唱歌叻,仲係一個「舞台人」,真係唔講都冇人知!不過,冇咩做過舞台劇嘅佢都可以叫自己做「舞台人」,呢個世界個個都可以咁樣稱呼自己啦!
官恩娜亂噏錶價貴變平
早前官恩娜(Ella)獲邀到內地參與腕錶活動,戴上三十多萬元經典鑲鑽名錶行騷的她說:「我初頭都唔知喺騷戴嗰隻鑽錶咁貴,以為只係十幾萬,希望再有機會參加同類型活動!」
解讀:
Ella連行騷都唔清楚個錶價,仲要差成廿幾萬,佢數口咁差,如果做Sales一定蝕死間公司!其實出騷前應該搞清楚個價!唔係到時個個聽到咁平,爭住買咪出事!
Lavina搵Tommy做代言人
玩地下情的模Lavina(鍾蕙芝)與前E-Kids成員Tommy(阮民安)屢次被揭發暗地幽會,近日二人又被拍得在黃埔碼頭短敍,事後Lavina不作回應,只說了一句:「我依家忙緊,有咩問題就問Tommy啦!」
解讀:
Lavina咁講好難令人相信佢同Tommy兩個人係「清白」,佢咁講直頭就當咗Tommy係佢嘅「專用代言人」,Lavina咁信得過Tommy,話佢哋只係普通朋友嘅說服力真係好低!