由吳彥祖（Daniel）主演的新片《如夢》被選為《第34屆香港國際電影節》開幕電影之一，Daniel好友楊千嬅和馮德倫前晚均有出席首映，吳媽媽更專程由美國返港支持，Daniel揚言和女友Lisa S.已展開不設防造人計劃：「媽咪好錫我，我嘅戲佢實讚，女友就有讚有彈，近排我開始不設防，女友有咗就結婚、生仔，我會停工一年照顧佢，唔怕佢高齡產子，我二家姐都43歲至生BB。（女主角袁泉幾時生？）佢就生，呢幾日我都唔敢打畀佢，怕刺激到佢胎動。」
千嬅則說：「唔係我唔生，係一路有嘢做，我呢個年紀行步路都要小心，男人就瀟灑，女人體力負荷大。（男人打個冷震就得？）你咁都講得出口？我唔知，今年好多嘢做，係都出年先，公司合約冇講明唔畀我生。」
馮德倫則透露送了生日禮物給徐若瑄：「送咗個短訊。（佢話你追佢會考慮。）係咪呀？唔好點我。（佢讚你好男人。）多謝！（佢知唔知你心意？）唔知我個短訊佢明唔明喎！」