23/03/2010

播放本新聞相關短片

熊黛林提起城城慶合合

熊黛林(Lynn)昨日宣傳新片時,被甄子丹拿她跟郭富城的緋聞開玩笑,使她尷尬不已,其後Lynn接受訪問再被逼供,她盛讚城城是好男人,要好好觀察,未知是否提得城城太多,令她「慶合合」,更面紅紅地說:「要降溫!」

郭富城與熊黛林雖然從來沒有承認相戀,但已被認定是一對,昨日Lynn、甄子丹、黃百鳴與兒子黃子桓和新人鄭家星等宣傳電影《葉問2》時,甄子丹將Lynn與城城的緋聞擺上枱,他在台上盛讚自己是「男人人辦」、「男人想似,女人鍾意」,又讚自己「有經濟、風度及賣相。」自讚完一輪後,就指一指身旁的Lynn笑說:「你好似搵到喎!」令人聯想到城城,Lynn即一臉尷尬,先指一指甄子丹是好男人來為自己解圍,其後又說自己「搵緊」。

心目中好男人

穿上Christian Dior鞋及低胸裙的Lynn甚有睇頭,搶了不少風頭,其後接受傳媒訪問,問她是否還未找到好男人?她即扮傻說:「唔係講緊一啲結咗婚嘅好男人。」記者再追問她,心目中好男人應該怎樣?她說:「要為家庭拚搏、錫太太仔女。(身邊有冇男人有潛質?)要多啲時間去睇睇。(咁郭富城呢?)佢係一個幾好嘅男人。(有冇缺點?)冇乜特別觀察。」

Lynn甫聽「城城」問題即面紅紅,顯得有點尷尬,記者再追問是否因城城優點太多,所以看不到其缺點?她說:「可能呢,唔知呢。(冇缺點,即係搵到啦?)真係要畀啲時間我睇吓。」記者笑問Lynn看了三年還未夠?她即無奈苦笑說:「我都要做嘢o架!」

用手撥涼降溫

Lynn直言就算將來結婚也不會不工作,因沒有工作的女人會很容易殘,問她想不想另一半有所承諾?她說:「唔會要求任何嘢。(想幾時公開?)冇諗,任何嘢都順其自然。(幾時認定另一半?)未搵到,朋友同另一半唔同,要啲時間去睇吓。(欠乜嘢先做到另一半?)冇諗,不過,佢(指郭富城)都係好好嘅男人,好多女仔都覺得佢好好,我都覺得佢好好,不過,我唔知點講,冇想咁遠嘅事,做住朋友先。」

被記者問完一輪的Lynn,未知是否提到城城的關係,答問題答到面紅紅,其後更不禁用手撥涼說了句:「好熱,降溫先。」

另外,雖然甄子丹自稱是男人人辦,不過卻坦言不是一個好爸爸,因為沒有太多時間陪小朋友,尤其沒時間陪做功課,令他感到內疚。

影視組