擁有甜美笑容的方珈悠（Jaime），曾拍攝多個廣告，鄰家女孩形象又入屋，早前轉走快歌路線，出席活動時偶爾亦作性感打扮，她說：「唔係太性感我都接受到，而且嗰時係夏天，感覺健康就OK！」曾在加拿大讀書的她，直言喜歡間中Dress Up，開心之餘亦令外界有新鮮感！年初時，Jaime曾遊日本5日，為洗頭水廣告錄歌：「嗰次有5個地方嘅女仔去錄音，包括內地、日本、台灣、新加坡同香港，我當然係代表香港去啦！呢個機會真係好難得，成個Trip都安排得好好玩、好開心！」

少有作性感打扮的方珈悠，青春可愛。資料圖片	方珈悠早前到日本錄廣告歌，感到十分開心。	轉走勁舞型女路線的方珈悠，令人耳目一新。

赴日拍MV

除錄廣告歌，她亦有份參與MV拍攝：「雖然冇份拍嗰個廣告，但係有得唱同拍MV都好開心，而且呢個Trip一啲都唔辛苦，去5日做3日嘢，仲有2日時間畀我去行街Shopping，就算唔買嘢，可以行吓街都好輕鬆、好開心！（瘋狂購物？）今次都唔算o架啦！」

她笑言因為廣告歌是英文歌詞，因此毋須苦練日文，因此這次公幹之旅零舍輕鬆！Jaime坦言假如有份拍廣告更好：「我梗係想喺日本拍廣告啦！希望啲日本人睇完個MV之後會搵我啦！（同其他女仔點溝通？）雖然我哋5個女仔係來自唔同地方，不過有時講吓英文，有時又講吓普通話，再加埋身體語言，溝通完全冇問題，而且一齊錄音嗰陣都好開心，可能大家年紀唔係差好多，所以有好多共同話題，不過畀我揀嘅話，今年我想拍多啲戲！」

不要當花瓶

平日熱愛看電影的Jaime，很想走入大銀幕擔綱其中的角色，但不要當花瓶！問Jaime最想演甚麼角色時，她想也不想便說：「我最想做嗰啲心理有問題嘅角色，我想挑戰吓自己嘅演技，做啲同自己好唔同嘅角色，最好就係嗰啲唔知自己做緊咩、好瘋狂又好聰明嗰啲，如果可以做精神分裂嗰啲就最好。（想同邊個演員合作？）最好可以同大師兄鄭伊健合作啦！佢咁有經驗又係影帝，一定可以幫我入戲！」Jaime說着即手舞足蹈，模仿着瘋子的誇張神情，非常入戲！

後記：個性獨立

很多藝人因為經常有助手及經理人等幫忙打點，有時候變得很依賴，但擁有柔弱外表的Jaime，個性獨立主動，訪問時穿的服裝、配襯的飾物都是親自準備，訪問當日要她冒雨拍照，Jaime亦表現得非常專業，絕無半句怨言，敬業樂業的精神認真抵讚！