生活篇

問：你鍾意着便服、公仔睡衣定係性感睡衣瞓覺？

放大圖片	放大圖片	麥家瑜自爆最愛金城武，更視他為拍談情戲的幻想對象。

答：平日都係着便服瞓覺，背心短褲囉！由細到大都係同屋企人住，冇諗過要着咩特別性感睡衣，咁好似好奇怪嘛！我諗如果要試都要等我嫁咗人先會着啦！

解碼：哦！原來性感睡衣係Keeva嫁妝之一，咁各位Keeva嘅好朋友第時唔使為諗結婚禮物咁頭痛啦！

奇想篇

問：信唔信宇宙有第二個空間，嗰度又有另一個你？

答：咁恐怖！我想像唔到喎！都係唔係好信有第二個空間，如果你話世界咁大有一個人同自己性格、樣貌同聲線都好似嘅都有可能嘅，不過一定唔會完全一樣，因為我係獨一無二嘅！

解碼：咁又係，孖生姊妹都唔會一模一樣啦！每個人都應該係獨一無二嘅。

假設篇

問：假如要同好醜樣嘅男對手做感情戲，你會點樣培養情緒？

答：雖然我冇咩演戲經歷，不過我諗最緊要都係投入角色，而且愛情唔係淨係包含外表，可以諗吓佢嘅好處，如果都係唔得，我會出絕招，合埋眼幻想對手係我偶像金城武啦！應該萬試萬靈。

解碼：厲害喎！Keeva未拍過戲已經可以諗得咁深入，睇嚟各位導演如果有咩角色啱都可以搵Keeva試吓喎！但若然對手真係金城武，會唔會反而難倒佢呢？

感情篇

問：結婚要搵圈中人做伴娘或姊妹，你會搵邊個？

答：梗係搵Mr.反串啦！仲要着吊帶短裙，相信大家睇到都會好開心。（如果只可以揀佢哋其中一個？）好難揀喎！Alan可以做埋司儀，但我又諗阿Tom扮女仔應該係最可愛‥‥‥

解碼：嘩！Keeva都幾識揀o架喎！仲精打細算，但咪住先，老友還老友，Mr.肯唔肯㗎？真係唔係黑心，如果我係阿Tom或者Alan一定求神拜佛Keeva嫁唔出。