憑舞台劇《金鎖記》獲《第十九屆香港舞台劇獎》「最佳女主角（悲劇/正劇）」提名的焦媛，原來已是第五次提名女主角，但前四次均落空，只有一次憑《誘心人》奪得過女配角獎。問到有否信心得獎，她說：「其實有提名已經好開心，頒唔頒個獎畀我都冇乜所謂，我唔係好恨獎，獎項對我嚟講都唔係佔好大比重，因為獎項只係符合評審嘅口味，梅麗史翠普夠公認係好戲之人，但都唔係次次提名都有獎攞。」

焦媛獲拍檔送上道具獎座。

劇中焦媛、黃嘉威及陳健豪有不少感情戲。

新劇玩多角戀

最近焦媛在舞台劇《紫．迷．藤》中作新嘗試，劇中她飾演一名社團首領的太太，但自丈夫「走佬」後變得寂寞空虛，最後與三名手下發生錯綜複雜的感情，焦媛說：「真係第一次同咁多男演員合作，終於明白到咩叫艷福無邊，加上今次真係得我一女仔，感覺好唔同。」拍檔陳健豪及黃嘉威是她演藝學院的師弟，大家對她亦很尊重，她說：「好在我哋都冇代溝啫！」

昨日，焦媛為舞台劇《紫》排練，開始前同劇演員及導演送上一個道具獎座及蛋糕，慶祝她獲女主角提名，亦預祝她下月2日生日。問到何時衝出國際？她說：「快㗎喇！嚟緊四月會去美加登台！」焦媛又表示在戲中跟男演員有親吻場面：「其實我同佢好熟，好尷尬，為咗衝破心理關口，我試過排排吓戲突然錫佢一啖！」