最近香港天氣反覆，時熱時凍，除咗容易病之外，要諗着咩衫出街都令小小So好苦惱！不過，話晒個衣櫃係自己嘅，都仲可以靈活調配，但藝人就慘啲喇！唔可以着舊衫，有時啲衫係贊助又唔着唔得，真係好麻煩！好似平日好健談嘅陳柏宇，之前出席一個戶外活動，小小So見佢一做完嘢就雞咁腳走。
小小So：走得咁快，趕住去第二度做嘢呀？
陳柏宇：唔係呀！你唔見我大汗疊細汗咩？
小小So：嘩！係喎！咁你唔拉起衫袖？
陳柏宇：拉唔到上去，因為啜住晒。
小小So：點解會啜住呀？你手臂有冇咁粗呀？
陳柏宇：唔係呀！件衫係膠質地，我出晒汗、濕晒，拉唔到上去咋！
小小So：咁同你趕住走有咩關係呀？
陳柏宇：我趕住返保母車涼冷氣兼換衫呀！
小小So：咁唔阻你喇！費事中暑賴我呀！