官恩娜（Ella）舊年喺無綫嘅《超級巨聲》中唱咗一首英文歌，唱功被評判激讚，除咗人氣急升，佢最開心係畀人封為「實力派歌手」！據知，當時有幾間唱片公司好賞識佢，密謀邀佢加盟，有人向小小So報料，話其中一間仲係巨星雲集嘅英皇添！日前小小So撞到Ella嘅閨中密友，點知佢話：「其實只係一場美麗嘅誤會。」
小小So：聽講英皇對Ella都好有興趣？
Ella好友：唔係，係誤會！
小小So：咩誤會呀？
Ella好友：之前Ella畀網民激讚，啲網民話如果Ella有間大公司照住，佢嘅發展一定好過依家，之後又討論佢去邊間唱片公司最好，其中有人提議Ella去英皇，傳吓傳吓，先有呢單料傳啫！
小小So：有冇公司搵Ella呀？
Ella好友：應該未有，就算有，Ella都唔會走住，因為佢同依家嘅唱片公司仲有合約，時間都幾長。