以一身Dolce & Gabbana打扮的Kelly，昨日出席在北京舉行的新國語專輯《微光》亞洲記者會，吸引逾百中、港及東南亞傳媒到場採訪。她的新碟由婚前開始籌備，直至蝦餃仔出世後七個月終於完成，Kelly笑說：「期間經過晒結婚生仔，揀嘅歌都好甜蜜，錄音時冇壓力！唱得好開心，蝦餃仔聽到我啲歌都笑晒。（幸福滿瀉！）都係o架！希望大家聽到都會開心啲。」

Kelly與唱片公司人員開香檳，預祝新碟大賣。

久未到北京宣傳的Kelly，與Fans攬到實。

慶幸冇被炒作新聞

榮升媽咪的Kelly變得非常感性，主持人當眾踢爆她前日跟內地媒體做訪問時，談及一班忠實粉絲時竟忍不住喊，她即場死撐笑說：「冇！係感動到眼紅紅，其實生完BB後感性咗，多咗死穴！以前有經理人鍾珍，依家多咗蝦餃仔同粉絲。」粉絲即場祝願Kelly將來帶同兒女一齊到紅館舉行個唱，她笑說：「我都想，驚老公唔畀。我都希望喺40歲前生多個，等佢哋4、5歲時帶埋上紅館一齊唱歌。」形象健康的Kelly被形容為「四零藝人」，即是「零走光、零是非、零緋聞、零結黨」。她坦言有些公司會利用是非為藝人炒作人氣，慶幸從未遇過這種公司。