有「萬人迷」之稱的英格蘭球星碧咸，在前晚一場賽事中勇戰受傷，賽後證實左腳腳跟腱撕裂！消息指他昨日已飛往芬蘭接受手術，預計至少休戰半年，甚至會就此掛靴！身為超級球迷的李克勤接受本報電話訪問明顯失落，他說：「好傷心、好可惜！」心疼偶像受傷的克勤表示，可以介紹跌打中醫給對方：「我有睇開相熟嘅醫生，如果佢有時間，我可以介紹畀佢，佢可以透過傳媒搵我！」

Chrissie提議轉行篤波

早年碧咸訪港時，曾為此改了其太太「Victoria」英文名的林建明亦大表可惜：「見到佢為受傷而喊真係好難過！不過依家醫學昌明，佢又畀得起醫藥費，深信佢可以好番，但外國人靠西醫未必有效，最好可以中西合璧，如果佢嚟香港醫，我願意照顧佢！」而周秀娜（Chrissie）則表示碧咸靚仔有型，就算掛靴仍有大把路數：「佢可以影住底褲廣告先，佢個廣告好Sexy，踢唔到波就轉行篤波（桌球），或者叫佢老婆帶佢入行，佢出碟我第一個支持！」至於陳慧琳則表示雖然不看足球，但亦戥碧咸感到可惜：「碧咸咁靚仔，可以試吓其他發展，最好係拍戲！」

曾於美國發展、有「亞洲版Beyonce」之稱的劉晨芝表示認識碧咸，跟對方見過幾次面，打算致電對方問候，亦會介紹對方睇中醫。