廉署上周四拘捕無綫業務總經理陳志雲，事件牽一髮動全身，有傳助查人士當中，有人爆大鑊指證無綫高層經常收厚禮，而且送禮方式層出不窮！曾是無綫司儀、現已變成棄將的王賢誌日前更爆料，指有人送月餅給監製，而有女高層則收名貴手袋，引起全城談論誰是「女袋魔」，令不少敢怒不敢言的圈中人大快人心！
「佢正一傻仔」
由於矛頭直指無綫一班女高層，令內部人心惶惶，昨日不少無綫女監製表態以示清白！無綫製作部總監曾勵珍（珍姐）昨日在電話中心情激動，要求王賢誌公開誰人收禮：「你叫佢公開講嗰位女高層個名！總之我冇收過袋！啲人唔應該喺呢件事上纏擾，佢（王賢誌）正一傻仔！（ICAC有冇聯絡你？）唔答得！有冇都唔應該同你哋講！」臨收線前更決絕地叫記者：「以後都唔好打畀我！」
至於曾舉辦大型生日會、與不少藝員同歡的製作資源部總監樂易玲，昨日則罕有地透過外事部副總監曾醒明回覆：「有關調查事件一概唔回應，公司覺得佢（樂易玲）唔應該講咁多！」至於有消息指女高層收手袋，他認為只屬傳聞，毋須進行內部調查。而曾監製《歡樂滿東華》等大型節目的製作主任何小慧說：「我冇收過呢啲嘢，唔擔心被調查，有需要會盡量配合！」《東張西望》監製張嘉玲則說：「收一、兩盒糖會有，名貴嘢就冇，唔驚調查！陳倩揚新年整十幾底蘿蔔糕派畀監製同導演！」
否認曾爆料
日前才勇於爆料的王賢誌，昨日竟褪軚為「收禮」言論解畫：「我唔係咁講！只係話喺雜誌睇過，唔係我講有女高層收袋，唔知點解咁寫！（怕有影響？）我冇咁講過，報道好無聊！」他強調沒有與曾勵珍及樂易玲聯絡。另有傳當年陳志雲為捧崔建邦及鄧健泓而「整治」他、林曉峰及梁思浩，他避忌地說：「唔知！發覺有唔妥咪走囉！」他更有感陳志雲現況可憐：「我唔心涼，仲有啲戥佢可憐，努力咗咁多年，咁樣離開好黯然！真係一念天堂，一念地獄！」其後他又致電記者，再一次澄清冇做「金手指」：「我今日收到幾個電話，個個叫我要講就指名道姓，都擔心被ICAC問話！」