對於無綫採「封城計」，與無綫不歡而散的袁彌明繼續「踩多腳」，直斥無綫作風老土：「咁搞笑？無綫自己做傳媒都唔畀傳媒入嚟？咁樣只會令件事愈鬧愈大！我覺得無綫今次嘅作風好老土，咁樣封鎖消息，當自己王朝咁！佢哋請得呢個人（指陳志雲）做高層，冇理由人哋一有事就縮沙囉！今次擺到明佢哋唔想處理蘇州屎！（有冇少少同情陳生？）我唔知佢做過啲乜喎！如果佢真係有做錯事，唔值得同情！不過有冇做過就佢自己先知！」
白韻琴勸悔改：天國近了！
至於曾在《志雲飯局》舞台版擔任嘉賓的白韻琴，則未有傳短訊慰問陳志雲，卻大拋佛偈形容今次事件：「TVB都唔係第一次有呢啲嘢發生，嗰啲人都返番去做o架！有啲事後仲陞官發財添！套用佛家講法，『福兮禍所起，禍兮福所歸』，人生無常，福禍難測！根據以往嘅紀錄，呢啲都只係小風小浪啫！」向來敢言的白姐姐，對於無綫的「封城計」更有特別見解：「天國近了，你們應該悔改。」