古巨基、江若琳及鍾舒漫等前晚錄影《博愛歡樂傳萬家》，眾人以《逐格鬥》遊戲方式籌款，江若琳玩遊戲時十分落力，她說：「好期待玩拉水泡同用面黐瓜子，我會不顧儀態咁玩，其實電視威力真係好大，之前有個伯伯問我『你媽咪戚美珍喺邊？』，我諗佢睇過我做苗僑偉個女！（問你男友係咪吳卓羲？）咁又冇！我都想知邊個係佢女友，我同佢太熟，做唔到情侶。」
至於古巨基表示不清楚張繼聰臨時被飛出節目，對於有指因謝安琪亮相有線，連累老公張繼聰，基仔說：「我唔了解嘅事，向來唔回應，我只係節目其中一個表演者。（無綫專橫？）不如求證咗再講。（點睇Neway收購加州紅？）應該冇影響，英皇同Neway合作得好好。」
