昨日是黎明與樂基兒結婚兩周年的紀念日，不過忙於為新片《火龍》宣傳的他，暫時放低私事，出席《第34屆香港國際電影節》記者會時，經記者提醒下才記得紀念日，但原來晚上已準備慶祝活動。

拍戲跳樓冇難度

有「金句王」之稱的黎明再出招，問到片中要應付大量動作場面，會否難以應付？他說：「六樓跳落嚟你話高唔高，係有高度，但冇難度。」對於旗下Amusic控告加州紅及Neway卡拉OK，黎明表示一切交由行政總裁王凱文處理，自己集中精神宣傳新片，他說：「依家只有兩個選擇，一係繼續畀人非法使用，二就係依法行使公正，不過只能選擇第二個！」

黎明（左起）、導演林超賢及任賢齊落力宣傳新片。

楊崢（左起）、葉璇及廖啟智在台上分享趣事。

談到太太樂基兒加盟旗下公司，問到是否因其關係？他澄清事不關己，着傳媒追問經理人陳善之：「佢哋本身識，大家投票又佔多數，我冇咩需要唔接受。（同太太會唔會合作？）暫時冇。（佢強攻模特兒市場？）冇諗咁遠，世界有咁簡單就好。」適逢昨日是他與太太結婚兩周年，問到黎明會如何慶祝，他愕然地望一望左手，但手拿住咪的他未能望到手錶，但仍裝作鎮定地說：「係喎！（唔記得？）唔係！要做嘢，今晚仲要幫套戲宣傳。（之後慶祝囉！）係囉！（太太安排？）私人問題就交番畀私人。」記者再追問樂基兒踢爆他未有給家用的報道時，黎明即將咪交回記者，然後轉身離開。

女Fans進入公司

活動後，黎明坐保母車返九龍塘公司，有四名女Fans路過，眼見不少記者聚集，即上前詢問，當得悉該處是黎明公司時即甚為興奮，商量一輪後，她們走到黎明公司按門鐘，沒料到與職員談話幾句後竟可獲准入內！約五分鐘後，眾人情緒高漲地離開，還邊行邊看着相機回味。對此，Amusic發言人沈小姐表示，他們只知有人入公司拿東西，但並非與黎生見面，而昨晚黎明完成《火龍》MV首播禮活動後，便乘保母車返上水愛巢與太太慶祝。