今年春夏,充滿少女味的花花Print獲年輕女星力撐,設計師陳刀表示春夏花Print可謂「Never Die」,今年流行碎花,配襯不當很易變師奶,向來有Baby Fat的衞蘭(Janice)就因而變成「花師奶」!
衞蘭
「佢着得太Hea,件衫又好闊,再加幾個環保袋就真係成個師奶咁!花恤衫本身好蝦人着,要揀貼身同襯得好先唔會出事。」
曹敏莉造型Out晒
「佢嘅大花花圖案已經Out咗,今年流行碎花,都好啱佢着,而且佢個配搭方面都過時,加上佢條頸同對手好冇嘢,加番啲首飾會較好。」
陳嘉寶襯錯背心
「Anjaylia(陳嘉寶)青春活潑,條碎花連身裙好啱佢年紀,但襯咗皮背心外套,感覺就好秋天,而且佢對短Boot同樣錯咗質料,如果襯對涼鞋會好啲。」
汪圓圓着錯橙鞋
「圓圓嘅着法好穩陣,可惜又冇咩驚喜,佢最大問題就係襯咗對橙色高跟鞋,令成個感覺都格格不入,如果襯對紅色高跟鞋,再加番啲金色首飾會較好。」
何超蓮夠晒Sweet
「佢身形好靚,個樣好Sweet,都襯花花Print,可惜佢唔夠高大,如果件衫係Kelly着反而啱身,仲會好型,但超蓮着嘅話就會顯得鬆身,件衫再Fit身啲會比較好。」
莊思敏皮褸最型
「莊思敏着得最好睇,佢個大膊頭皮褸好Sharp、好襯佢,撞埋黑色花Print效果好型,件外套如果唔拉埋拉鏈仲靚!」
陳刀Profile
陳刀畢業於香港理工大學,03年舉行首個個人時裝展,曾是不少歌星的形象設計師,今年曾為I Love You Boyz設計頒獎禮服飾。