剛從澳門做騷返港的江若琳昨日出席《Alice In Wonderland》時裝騷，她透露在澳門做騷時當眾爆呔：「我着住條低襠褲，出場時一擘即爆呔，縫完上台跳，聽到好大聲爆呔聲，中間又裂開，好彩有打底，否則中間會同大家『Say Hello』。」為以最佳狀態示人，她在騷前節食，騷後即大解放，盡享澳門美食！
同場的泳兒穿上b+ab新裝現身，她自言向來愛看童話，小時會發白日夢投入其中，更自爆曾以比堅尼上陣扮美人魚：「當時喺新加坡讀書，有次要扮美人魚，因為行唔到路，所以畀人用架好核突嘅推貨車仔推出嚟，上身係比堅尼，後悔當時冇影相。（好性感？）當時仲細未發育，依家我冇勇氣扮，因為怕大家個焦點放喺我唔想嘅地方。（唔想性感？厚酬都拒性感？）呢刻未接受到，但唔代表日後唔得。」