本文重點
「天王嫂」熊黛林（Lynn）與「警鐘胸」Jessica C.繼互鬥性感後，再鬥冧仔招數，各自投其所好冧男友！與城城戀情逐漸浮面的Lynn，嗲爆表示最愛打邊爐；Jessica C.更直言男友最愛她戴脷環！
日前被拍得與郭富城打邊爐的Lynn，前晚「升呢」以嘉賓身份出席《意大利珠寶匯演2010》，全程勁風騷，穿上性感晚裝騷身材，而行騷的模特兒包括「死敵」Jessica C.及Ana R.等。不過，「警鐘胸」Jessica C.由米蘭返港後縮胸，穿上大會的Tube Dress，身材未見凸出，被Lynn搶盡「峰」頭！
提到與城城的戀情逐漸浮面，Lynn風騷地說：「食飯之嘛！好簡單。（飽唔飽？）梗係要食飽！（打邊爐唔悶？）你哋知我鍾意o架！（BBQ？）有同同事去，我喺南京日日打邊爐，香港啲嘢食好淡，鍾意食鹹啲！（城城鍾意濃味？）係啩！（同張智霖混熟？）唔好再逼我！唔答喇！」對於城城將GTR戰車車牌換上「NN887」，被指是確認其天王嫂地位，她說：「唔係我個名，唔知咩意思。（求知欲？）冇！（轉車牌？）我個車牌亂七八糟，唔使咁靚，唔係好易被認出。」提到會否效法樂基兒不用老公送樓，她大表認同：「女人要靠自己要獨立，唔一定要畀男仔養！」
假鑽戒換走真鑽石
另外，Jessica C.昨日穿上時裝品牌b+ab出席新城市廣場 X 《Alice In Wonderland》時裝騷， 剛與男友Sergio在米蘭過情人節的她，說話時舌累脷，她承認戴上脷環，表示男友最鍾意：「三年前穿，因為Model唔可以紋身，脷環可以收埋，初時戴5至6個月都好痛，成個嘴腫晒又流口水。」問到情人節收到甚麼禮物？她表示收到鑽石形戒指，問到為何不是鑽石？她說：「佢話唔想買真鑽石，覺得呢隻更加襯我！（求婚？）仲未！」她則送了鑽石耳環和咖啡機給男友。
