前港姐何傲兒最近進軍模界，成為熊黛林師妹，實行電視台天橋兩邊走。雖然看似前景康莊，但何傲兒話畀小小So聽有幾苦！
小小So：最近見你成日行護膚牌子騷，遲啲會唔會做全職Model？
何傲兒：我同TVB仲有約，另一方面Style嘅Kim又好錫我，我梗係希望兼顧雙方啦！不過你唔好以為走兩棲路線容易，因為拍戲時間長，皮膚會較差，而且拍戲拍到凌晨又消夜，當堂重咗！
小小So：模特兒經理人Kim有冇下令要你減肥呀？
何傲兒：佢有建議我減少少！早排有個騷，我一拍埋其他Model就出事，好明顯我比人多咗啲肉，真係要減番7、8磅至得！
小小So：你點減呀？唔食嘢唔得㗎喎！
何傲兒：當然唔會唔食嘢，更加唔想食藥咁唔健康！我依家每日三餐都加咗麥皮，健康又幫助消脂。如果夜瞓就食蘋果或飲暖水，令我有飽肚感，希望成功減肥後着衫會再好睇啲，露多少少都唔使就住晒！