天生一副外父相嘅鍾鎮濤（阿B）早前再為人父，女友范姜誕下BB女Eloise，三名女兒當中，阿B與二女鍾懿最Friend，就連登台都會帶埋囡囡同范姜一齊去。有次小小So就同阿B傾開湊女經，講到愛女鍾懿嗰陣，阿B即時呷醋咁話：「佢係個阿姐嚟o架！每次去登台，都有成三、四個人服侍佢！」小小So聽到後即時呆一呆，心諗鍾懿人仔細細，唔係咁快就咁霸道呀？阿B見到小小So一臉錯愕，就笑笑口解釋：「因為鍾懿嘅阿姨好錫佢嘅，所以每次行程許可嘅話我哋都會帶埋阿姨一齊去，加上鍾懿太識冧人，所以佢媽咪同工人都好錫佢，個個當佢皇帝女一樣，搞到有時我需要人幫手，都冇人得閒理我！」原來阿B只係呷個女醋，不過見到阿B講起鍾懿時嗰個冧樣，就知呢個慈父嬲極有限啦！