殺手篇

問：見到曱甴會有咩反應？

答：第一眼會驚，但之後都係由我嚟做劊子手，我「行兇」手法多數係閂埋啲窗噴殺蟲水。

問：信唔信有鬼？

答：當然信呢個世界有鬼，因為我係基督徒，我信有神，亦信有鬼。

解讀：點解要由我嚟做曱甴殺手？因為我大膽囉！屋企人見到曱甴個個閃走晒，唔係我處理，仲有邊個？曱甴死咗後會唔會化成厲鬼返嚟報仇？呢個我唔知呀！

愛情篇

問：忍唔忍到男友成日(目及)女？

答：忍得到，點解忍唔到呀？睇女仔之嘛！做女友唔係要咁專制，唔准男友呢樣，唔准男友嗰樣嘅！　

問：最討厭咩類型嘅男人？

答：冇風度囉！話明「男士風度」，作為男人要有一定風度。其次討厭唔注意衞生、唔乾淨、畀人感覺好邋遢嘅男人。

解讀：其實鍾意望靚嘢，係人之常情，男友(目及)女係好自然嘅事，睇靚仔、睇靚女，人人都會啦！所以我會由得佢，只要唔好過分，睇靚女係可以接受嘅！

臭狐篇

問：遇着啲朋友有臭狐，會點對付？

答：我會善意同佢講出事實，話佢知佢有臭狐，叫佢注意一吓，去做手術根治，試吓用止汗劑，或者要勤啲清潔。

問：你覺得死咗之後，會入土為安、上天堂、落地獄、定投胎再做另一個人？

答：上天堂，因為我係基督徒，我信咗基督教三、四年左右，我嘅信仰話我知基督徒死後會去天國。

解讀：現實生活中，我未試過有朋友有臭狐問題，反而出街就遇過唔少有體味嘅人，不過都冇乜辦法，惟有行快步，走為上着。