前日互聯網流出數張疑似黃長發的情慾照，已退出幕前的長發再度成為新聞人物，昨日更有大批傳媒在其位於中環的辦公室大廈門外守候。雖然長發前日大方接受記者訪問，但昨日的態度卻一百八十度轉變，中午外出用膳時，他對記者拍照及發問一律零反應，期間長發友人更揚言拍照要收「八百元加10%」，而長發只在餐廳逗留了四十五分鐘便離開。之後，他於晚上七時十五分從另一個停車場離開公司，並一支箭標上的士成功擺脫傳媒。

昨日大批傳媒在黃長發於中環的辦公室大廈門外守候。

據知黃長發為撇甩記者，由大廈另一個停車場離開。

返屋企唔見人

記者昨日多次致電長發，但他均以有事為由拒絕詳談，其中一次更由一名自稱是霍小姐的公司職員代為接聽，她說：「今日大廈管理員嚟投訴，話因為門口太多傳媒嚇親大廈啲人，老闆亦為咗呢件事好唔開心。阿發為咗唔好為公司同其他客戶帶嚟不必要嘅騷擾，所以決定返屋企避開傳媒，連電話都留低埋畀我哋，我哋都唔知佢聽日仲會唔會返工。」

由於長發刻意避開傳媒，記者就有關疑團致電長發哥哥黃長興，他透露弟弟直認其中三張容貌清晰的大頭照片確是自己，至於為何被拍得汗流滿面的照片，長發則沒有解釋，只暗示「欲加之罪、何患無詞」，長興說：「阿發認有啲相係佢，但Video就唔關佢事，至於點解其中一張佢嘅相會冇着衫，佢覺得唔需要解釋，因為佢話要將兩樣嘢合成埋一齊嘅話，梗係要搵張最合理嘅相擺埋一齊啦！」長興又表示長發與家人暫未決定將行動升級：「我哋唔會做任何嘢，唔需要理呢啲人！我哋唔擔心！大家都知道唔係佢！」