成龍經常喺傳媒面前隔空向個仔房祖名訓話，其實內心錫個仔錫到燶，之前小小So同成龍傾開偈，佢話個仔追新科技追到中晒毒，不過身為老竇嘅佢咪又係全程配合。
小小So：你都幾新潮，iPhone都要兩部。
成 龍：梗係唔係啦！依家出到3GS版，我呢兩部都係2G版，係個仔唔要嘅，你知唔知佢第一部iPhone係我專登喺美國買畀佢o架！
小小So：我知，祖名同我講過，你成日話唔錫佢，咁仲唔自打嘴巴。
成 龍：哈哈！唔係點呀！嗰時香港冇得賣嘛！我喺美國咪買畀佢囉！佢個衰仔，玩唔夠一排出新嘢，咪將部舊嘅畀番我囉！
成 龍：之前我有部最新款Apple Notebook電腦，祖名一見到就話正，仲話：「老竇，你都唔用o架啦！我用住先，畀部舊嘅你用吖！」
小小So：我又唔信你唔畀佢囉！最後咪又係由得佢。
成 龍：唔畀佢又去買，咁浪費。