陳霽平（Maria）生於台灣，父母亦是台灣人，但孩提時代已隨父母來港居住，其後再到美國及加拿大讀書，所以對各地文化都有一定了解，對於近年香港出現「港女」、「公主病」及「貪慕虛榮」等形容詞，Maria卻不認同，因為她所認識的香港女性，有許多都溫柔細心，並沒有因男友疼錫而恃寵生嬌！
Maria覺得患上「公主病」問題亦不大，只要不是過分就可以：「我覺得『公主病』可以分為『重型』同『輕型』。『重型』係一種病態，對男友好多要求，當佢哋係工人，一啲都唔尊重，呢啲女仔好唔啱！不過有啲只係有少少『公主病』嘅，好似叫男友車自己、病就嗲吓男友咁……我覺得男人會接受，因為有時女仔太強，唔需要男友照顧，男人未必咁Buy！」
口是心非更糟
至於有些人指「港女」驕傲愛挑剔，Maria覺得香港女性獨立性強，很多都有經濟能力，所以做事有主見，對男性亦可顯出最真的一面：「女仔鍾意就鍾意，唔鍾意就唔鍾意，總好過扮嘢咩都話好，其實就口不對心，咁咪仲衰！」她覺得一個有要求的男人，反而喜歡一些性格率直、有見地及有智慧的女性，這樣雙方才有所交流。
提到男女相處之道，Maria認為一個理想女友，應該懂得尊重男友及其家人，當然溫柔體貼亦是重點之一：「我鍾意不時搞啲新意思、得意節目，送驚喜畀男友！」正跟趙式言拍拖的她坦言，跟男友家人相處得很好，男友家每周都會集齊家庭成員食飯，她有時都是座上客：「我好鍾意食伯母煮嘅日式炸豬扒o架！」至於何解會跟伯母如此好感情？原來她們很早已認識，彼此有着深厚感情。
「無法」減肥肉
陳霽平覺得理想女友除了要溫柔體貼外，有智慧亦是重要一環，而她讀書都相當出色，還曾任中大傳理系助教，問她是否天讀書材料？她笑說：「唔係！我細個讀書麻麻，好彩爹哋幫我補習，令我嘅成績突飛猛進！之後我去美國讀書，因為唔識英文，冇晒朋友，所以就極速學好英文，之後讀書就非常順利！」
除了有學識，Maria對減肥美容都甚有心得，她覺得最佳的方法便是「不去想方法」，很有「黎明金句Feel」：「我喺美國曾經肥得好厲害，所以用盡方法減肥，結果因為成日逼自己唔食嘢，反而成日想食嘢，結果就食多咗，加上不停做運動，變得好大隻！不過返咗香港之後，我冇再去諗點減肥，咁反而食少咗嘢！而做運動就只係間唔中做，有時就一邊睇電視一邊踩單車，結果慢慢瘦咗！」
優質港女人辦
在陳霽平眼中，香港有許多優質港女，當中陳慧琳與莫文蔚便是最佳例子：「佢哋都以真性情待人，毫不造作，加上學歷高，唱歌演戲都做得好！最緊要係對人斯文有禮，係好好嘅學習榜樣！」她認為陳慧琳就算結婚生仔後，仍能兼顧事業及家庭，令人羨慕！
Profile
姓名：陳霽平（Maria）
身高：5呎5吋
學歷：於美國接受中學教育，然後到加拿大升讀大學，回港後在中文大學修讀碩士課程，曾任中大傳理系助教。
語言：英語、日語、西班牙語、法語及普通話。
曾拍攝劇集：《珠光寶氣》、《東方之珠》及《高朋滿座》等。