玩具大王蔡志明個囝囝蔡加讚早排開咗間甜品店，可能啲人會覺得佢只係玩票性質，其實佢不知幾認真去做。有次小小So去佢間甜品店食嘢，就見到佢喺度親自監場，仲好細心咁聽啲客人嘅意見，咁畀心機，難怪生意愈做愈好。
小小So：你成日都會落舖頭巡視業務㗎？
加讚：係㗎！一有時間我就會嚟，有好多嘢都係親力親為好啲，好多時有啲問題，如果唔係自己親身體會係唔會知，我仲照顧埋啲員工嘅需要，等佢哋可以融洽工作。
小小So：啲甜品你有冇份諗㗎？
加讚：係我同啲師傅一齊諗，有好多嘢係我哋創作出嚟，出面食唔到。但有幾款嘢畀人抄襲咗，惟有不停諗啲新嘢出嚟！呢度樣樣甜品我都試食過，試到個人都肥埋，連個餐牌入面嘅相都係我影㗎！
小小So：啲客人會唔會畀意見你？
加讚：會，客人嘅意見好緊要，我哋會盡力去滿足客人嘅需要。
小小So：有冇諗住幾時回本？
加讚：甜品店上年10月先開張，到咗12月已經回本。生意愈嚟愈好，生意額係倍升咁增長，好開心！