崔建邦捲入涉打女友風波後，一直未有返「娘家」無綫，不過被起訴後，他昨日主動到電視城見高層樂易玲，匯報事件。樂易玲透露崔建邦瘦了十多磅，精神不俗，指他匯報事件時充滿悔意，一度眼濕濕！對於崔建邦被起訴，樂易玲不擔心，皆因是意料之內，她感到崔建邦態度積極：「佢知道要負咩責任，佢有講呢件事係佢畢生最後悔嘅事，佢話會珍惜前途。佢由邊度跌低，咪喺邊度企番起身！」她指無綫不會放棄崔建邦：「做錯事唔係絕路，無綫會畀機會佢，但接唔接受要睇觀眾，佢都要爭取番觀眾對佢嘅信任。」
另外，盛傳與崔建邦翻撻的唐詩詠，得知對方被落案起訴後，以敏感為由不願多談，但仍鼓勵他：「無論發生咩事，都希望佢用正面態度面對！（愛火重燃？）可以做番朋友，總之一直我都相信佢！」至於會否到法院支持崔建邦，她表示要視乎工作安排，言談間盡顯關懷之情。