亞視搞《亞洲星光大道》，羅力威挾周杰倫同言承旭混合體之名，擊敗全部對手，成為第一屆冠軍，好多人同小小So講，話佢大牌過天王巨星，影相例牌扮Cool，堅持唔肯笑，而且問一句答一句，以為佢新人出道唔識面對傳媒同鏡頭，而且有啲怕醜，點知佢同人講驚太多Fans纏身，依家出入全程要戴口罩，其實羅生會唔會諗多咗呢？
小小So聽啲老友爆料，話佢早前拍MV，全程意見多多，好唔合作，導演原本安排個浪漫嘅愛情片段，點知羅力威驚影響形象，唔想同對手有接觸，嚇到大家O晒嘴。雖然佢的確有音樂才華，唱得又作得，但好多幕後都喺背後議論紛紛，話如果佢唔改吓自己嘅脾氣，學吓同人相處，就算亞視肯畀機會佢，都好難繼續保持人氣！
