關楚耀（Kelvin）跟前女友衞詩（Jill）去年2月24日於日本東京涉嫌藏毒被捕，事件距今將滿一年，但兩位主角命途卻大有不同，Kelvin獲契爺譚詠麟及多位圈中好友力撐而「停薪留職」，雖然去年10月Kelvin被爆搭上台灣o靚模Mika，令原定去年11月復出的計劃受阻，但本報昨日致電環球唱片高級副總裁黃劍濤（Duncan），他親口證實Kelvin的復出計劃：「3月底或者4月初會正式復出，依家錄緊新歌！（佢心情緊張？）梗係緊張！不過佢已經係時候出嚟做嘢，點都要面對大家，希望順順利利，得到大家支持！」他表示Kelvin將會參與新碟的幕後工作，現正埋首準備新碟，未知會否以新形象示人！另一邊廂，Jill被唱片公司Amusic棄用後，一直未有復工計劃，不過信奉基督教的她有孖生家姐衞蘭照顧，生活未成問題。

亞視有線搶「頭啖湯」

另外，由於四大唱片公司與無綫的版稅糾紛仍未解決，Duncan透露Kelvin與無綫的合約將滿，屆時他的復出將會成為亞視、有線等電視台爭奪的「頭啖湯」，而謝安琪將會繼歌神張學友後首度亮相亞視節目，明剃無綫眼眉。