鍾欣桐（阿嬌）近排再戰樂壇，佢覺得要喺樂壇穩佔一席位，除咗要唱得之外，都要有啲過人技能，所以佢近年好畀心機學跳舞，仲有意出外進修添！不過，工作繁重嘅佢，要向公司請成個月假，真係難過登天，所以佢一直都唔敢開口問經理人霍希汶（Mani）攞假，怕食「大檸檬」喎！
小小So：聽講你想去外國學跳舞喎？
阿嬌：係呀！美國又好，韓國又好，我都好想去，其實之前我都去過日本學過一排跳舞o架！
小小So：咁你幾時去呀？
阿嬌：隨時都去得o架啦！不過我未請假之嘛，我唔敢問Mani呀，不如你幫我同Mani講！
小小So：點解想去美國同韓國學跳舞呀？
阿嬌：因為我聽陳偉霆講，L.A.啲跳舞老師好勁，連啲學生勁過人，搞到陳偉霆跳到想喊！
小小So：依家未去到，你點望梅止渴呀？
阿嬌：我會喺網上Download啲跳舞片段，得閒就攞出嚟睇，啲人梗係跳得好勁o架！我覺得睇呢啲片係最大嘅娛樂，因為我真係好鍾意跳舞嘛！