擁有日、韓血統的長谷川唯，兩年前加入模特兒行列，成為日本時裝雜誌Blenda的御用模特兒，早前她首度來港出席jft舉行的《J-Trendの109 Parade X Party》活動。甚有涉谷109系型格感覺的長谷川唯，原來為了做模特兒，背後付出不少努力，除每日練習擺甫士外，饞嘴的她更足足減掉20多磅！

長谷川唯坦言當模特兒是由細到大的夢想：「我一直好想做Model，不過細細個好肥，兩年前有機會參加呢本雜誌嘅模特兒比賽，於是決心減肥，最後被選中做御用模特兒，真係好開心！」日本人工作出名認真，她透露試過開工24小時，從中獲益良多：「每次拍攝時，大家都表現得好專業，通常一大班人企喺攝影師身後，集中火力睇我嘅表現，初時都幾緊張o架！依家好好多。」

長谷川唯為保持苗條身材，不惜戒食最愛的甜品！

長谷川唯希望成為設計師，令時裝成為自己的Life Style。

夢想做設計師

對於不少模視攻日為終極目標，長谷川唯寄語姊妹們「奸爸爹」，要不怕辛苦肯搏肯捱，而她認為Baby就是一個成功例子：「佢真係好有潛質，唔講真係以為佢係日本人，亦都好可愛，我成日喺時裝雜誌見到佢，覺得佢擺甫士好靚，相信將來會喺日本發展得好好。（擔心被威脅？）唔擔心，反而同一本雜誌嘅模特兒會大競爭啲。（有咩事業目標？）自己好鍾意Fashion，將來想做設計師，令Fashion成為自己嘅Life Style。」

Profile

姓　　名：長谷川唯（Yui Hasegawa）

出生日期：1985年7月11日

出　生　地：三重縣

星　　座：巨蟹座

入行經過：2008年奪得時裝雜誌Blenda模特兒比賽冠軍，成為御用模特兒。