小小So近排出席活動咁啱撞到今屆香港小姐冠、亞、季軍劉倩婷、李姿敏同熊穎詩，佢哋情同姊妹，成日有講有笑，咁小小So就諗住行埋去八卦吓佢哋講乜啦！點知去到仲以為去咗外國，因為佢哋用好流利嘅英文溝通緊！
小小So：嘩！乜原來你哋平時係用英文嚟溝通o架？
劉倩婷：係呀！我哋個個都喺外國大，所以用英文溝通仲好過用中文！
小小So：你哋圍內講嘢可能好多人都唔會聽得明呀！
劉倩婷：其實我哋開頭講嘢都唔係溝通得好好，因為我喺英國讀書，李姿敏喺美國，熊穎詩就喺加拿大，我講嘅英文會有少少英國口音，有時講得快得滯都可能會聽唔明對方講乜！但依家聽慣咗就完全冇問題啦！
原來佢哋最重外國口音嘅係劉倩婷，佢仲話有時佢講講吓廣東話，會無端端有英文尾音，講得太快，人哋仲可能聽唔明添！而李姿敏就係最淡定嗰個，將來都會瞄準唔同嘅主持機會，計小小So話齋，港姐美貌與智慧並重，劉倩婷真係要快啲學好標準廣東話，如果唔係分分鐘會冇咗好多接Job嘅機會。