組合Square成員何尚謙（James）最為人認識的，可謂與o靚模羅凱珊（Kama）一段撲朔迷離的緋聞，到底他的真實一面，大家又知道多少？
生活習慣題
一日最多試過沖幾次涼？
5次，起身沖一次，之後約咗班朋友喺屋企附近打波，每次小休都返屋企沖涼，來來回回沖咗3次，因為真係好熱，到瞓覺之前再沖多一次囉！
解碼：James當沖涼係解暑大法？聽落都唔錯嘅，但一日沖5次涼，會唔會甩皮o架？
個人習慣篇
鍾意着T Back、孖煙囪定三角褲？
我鍾意着T Back，覺得好性感，但事實上冇着過，始終會怕醜嘛！我平日着三角褲，舒服啲嘛！
解碼：一個男人覺得自己着T Back有幾性感就真係唔知喇！不過，根據James嘅答案，到底佢係鍾意睇人着T Back？定係鍾意自己着？
喜好篇
畀舒淇同林志玲你揀，你會揀邊個做女朋友？
梗係舒淇啦！我一向鍾意呢個類型嘅女仔，天使面孔、魔鬼身材，加上之前同佢合作過一次，佢真係好親切，對住我呢啲新人一啲架子都冇，真係好吸引！
解碼：天使面孔同魔鬼身材？唔知可唔可以用嚟形容Kama呢？
回憶篇
幾多歲失身？當時嘅情況係點？
嘩！失身點答呀！好尷尬喎！喺屋企囉！嗰陣18、19歲，同女朋友呀！都拍咗3、4年拖o架喇！情況係……意亂情迷囉！大家都成咗年，合法o架！
解碼：估唔到James身為偶像派，對於失身呢啲咁敏感嘅話題，都肯如實作答，雖然係就係怕醜咗啲，都算抵讚啦！
番外篇
有冇試過畀人誤會抽水？
好似冇喎！不過畀人疑似抽水就試過，仲要係男仔。打招呼嘅時間，佢一邊握手一邊掃我背，我淨係識傻更更咁笑囉！其實唔會話太大反應嘅，我尊重每個人唔同嘅取向。
解碼：嘩！畀人抽水仲識得係咁笑？James有禮貌係好，但學識保護自己都好重要，睇嚟你真係要學吓講「唔好」喇！