郭秀雲：「每年我都會喺君悅搞萬聖節派對，周啟邦年年都會扮嘢出席，只係上年我太忙冇搞到，我覺得做人最緊要開心，唔好令人唔開心，佢就做到自己開心，身邊人都開心。」
Rosemary媽咪Julie：「好突然！佢離開前見到孫仔一面都算安慰！邦邦份人好好、好尊重人，佢係最支持Ball場嘅人，Ball場冇咗佢真係好失色！佢一出場就好搶鏡，係Ball場典範，佢認第一冇人敢認第二！」
寇鴻萍：「邦邦份人好風趣又幽默，好好人！佢永遠係Party嘅主角，如果請到佢去係一個榮幸，因為次次佢都好悉心打扮配合主題。」
去年出席邦邦兒子周國豐婚宴的丁子高：「我同佢哋都熟。（周國豐婚宴）嗰日我放低賀禮就走，都見到Uncle，知道消息真係好突然！」
江欣燕：「我爸爸以前同周Uncle係朋友，所以我六、七歲已經識佢，去過佢屋企開派對，仲記得佢屋企個廁所係金色。我好唔捨得佢！」
謝賢：「我同佢識咗好多年，但唔算太熟！覺得好可惜。佢為人好和藹可親，好好人！我都好耐冇見佢，希望佢家人節哀順變！」
胡楓：「我同Brenda嘅阿哥譚永成（林鳳老公）比較熟，不過同Brenda都識咗好多年，但好幾年冇聯絡！近年我睇報紙都知周啟邦有病，佢咁樣去咗當然可惜同難過啦！」
夏韶聲：「幾時嘅事？老婆叫我返嚟探佢，但依家做唔到！我哋識咗20幾年，佢太太好鍾意唱歌，幾年前佢哋去羅省時仲探過我，最後一次見佢哋係07年演唱會，佢哋嚟捧場仲送花畀我！」
公關公司老闆區詠梅：「上年去邦哥個仔的婚宴時，佢拖住我隻手，好親切咁叫我一聲妹妹，見到佢時都知佢好攰，話之後約出嚟食飯，估唔到佢病情咁嚴重，五日前我都打過電話畀Brenda（周太），Brenda話邦哥唔舒服，唔出嚟食飯，話邦哥唔想見其他人，所以我冇去探佢。」
信和集團商場推廣總經理蘇蔡潔蓮：「前日（大前日）仲同Brenda（周太）傾過電話，好突然，我同邦哥喺Ball場認識，係最真心的朋友！佢對我非常好，好錫我，我哋曾經一齊試過兩次出埠旅行，試過一次去Ball扮嘢，我扮王后，佢扮皇帝，到依家佢都仲叫我做王后！」