小小So睇住林莉選美出身,真係覺得佢選完港姐後,愈變愈靚,睇落同林志玲都有幾分相似。有日小小So咁啱喺街撞到佢,就擇日不如撞日,大家一齊去咗歎下午茶,雖然滿枱食物,但就見佢食得好少。
小小So:點解食咁少嘢?
林莉:近排要Keep Fit減肥。
小小So:吓?仲要減?你已經好瘦。
林莉:係呀!因為行騷啲衫好細件,肥啲都着唔落。
小小So:咁你點減呀?
林莉:我好鍾意食嘢,惟有食少啲囉!
小小So:太瘦唔靚?
林莉:都係,我塊面有啲肉,啲人會覺得我靚啲同有貴氣啲。
小小So:有冇做運動配合?
林莉:我好忙,都冇時間做運動,好彩我係易肥易瘦嘅人,食少啲就好快瘦番。
林莉已經又高又瘦,仲要減肥,真係明白到搵食艱難,原來做Model都唔易。