行慣性感的廖碧兒前晚以露背兼露肩造型出席《葉問前傳》煞科宴，可惜遇到勁敵！17歲女新人陳嘉桓（Rose）以大露背裙上陣，碧兒明顯被比下去。問到面對這類青春無敵的後輩可有威脅？碧兒說：「佢輩分高啲！佢學咗功夫好耐，係師姐嚟！（唔驚佢青春殺晒？）冇得驚！年年都有新人入嚟，反而對自己係挑戰多啲，唔可以好懶，要學多啲嘢。」

陳嘉桓笑言今次是性感極限。

徐嬌也有出席煞科宴，擺出可愛甫士任影。

結婚先再講

另外，緋聞男友陳豪最近被傳與佘詩曼撻着，但阿佘暗示已做定人情給對方，碧兒再提此事時冷淡地說：「我冇乜留意，只係覺得好唔抵，影響到我屋企人，令我爹哋唔開心！（阿佘話你哋唔肯認拍拖先拖埋佢落水！）人哋有佢自己嘅答法，畀人帶咗上嚟我都冇辦法！（咁你係咪同陳豪拍拖？）我唔會再答，唔想同緋聞宣傳，將來結婚生仔會同大家分享。」至於Rose則透露現時也有斟洽其他電影，問到會試甚麼類型角色？她說：「各方面都想試吓！（性感？）我只有17歲，相信公司都唔畀，或者18歲後至考慮，今日已經係最性感。」