每個人都有死穴，蔡卓妍（阿Sa）亦唔例外！早排小小So喺一個飯局八到單嘢，話說阿Sa有次同師弟陳偉霆（William）、同事食飯，飲飽食醉後，侍應就奉送生果盤，生果盤少不免有橙、西瓜同提子等，都好正常吖！
點知阿Sa一見到個生果盤，原本有講有笑嘅佢突然面青，仲用雙手掩口想嘔咁款，個樣驚到震，唔敢望個生果盤，行為異常，嚇親唔少人！助手即時叫侍應攞走個生果盤，而William就遞杯橙汁畀阿Sa聞，佢先由「汗顏」變「歡顏」，緩和個尷尬氣氛！William咁識服侍師姐，氹女仔果然有一手，難怪咁受女仔歡迎！
事後小小So收到風，原來阿Sa超驚西瓜，聞到西瓜味都有作嘔感覺，所以佢上美食節目，係唔可以同西瓜有任何接觸，因為呢個係佢嘅死穴，係佢人生中最不能接受嘅食物！