樂瞳早前推出EP《短罪》，自爆錄音時曾被監製鄧智偉鬧到喊：「智偉向來都好錫我、好照顧我，不過有次錄音，佢想我唔好放太多感情落首歌度，想我以第三者嘅身份好似講故事咁唱，但係我唱嚟唱去都達唔到要求，我見到佢好唔滿意嘅樣，我就諗『係咪我做得唔好』、『係咪我好差』，諗諗吓就忍唔住喊咗出嚟！」

需時間平復

樂瞳自我要求甚高，因她以偶像濱崎步為發奮目標：「我覺得佢好似公仔、好靚，依家個形象會向佢參考，但我都會試多啲唔同嘅形象。（好似步姐咁性感？）我身材麻麻喎！適當性感都可以，不過成日性感人哋都睇厭啦！」

至於感情生活，樂瞳坦言現時零目標，以事業為重，又自爆大半年前與男友分手：「我仲要做咗第三者都唔知，我以為佢忙，所以幾日先搵我一次，仲要次次見親都要12點就走，不過佢又帶我見佢屋企人，好似畀好多希望你咁。最後我知道佢原來已經有女朋友，於是我就決定同佢分手，感情嘅嘢都仲需要一段時間平復嘅。」她坦言難忍做第三者，剛好其主打歌《短罪》正是講第三者的故事，故每次唱的時候都有想哭的衝動！