電影《吸血新世紀》漫畫版第一章將於3月中出版，其中10頁內容日前曝光，內容忠於原著小說，姬絲汀史釗活演的貝娜，發噩夢見到人狼和吸血鬼的場面，以及她與羅拔柏迪臣演的吸血殭屍愛德華，在學校邂逅及上堂做實驗的情節都有齊。不過，主角造型與電影版大有出入，皆因Stephanie專誠邀請大學修讀藝術的韓國女漫畫家Young Kim繪畫，所以畫功和主角造型甚具東洋味道，似足日本漫畫，角色亦有點矯揉造作，長髮的人狼雅各（Taylor Lautner飾）似女仔多過男仔，忠實《吸》片迷未必能接受。

羅拔闖樂壇Sell實力

不過，Stephanie受訪時卻大讚Young的畫功出色，並為角色增添東洋味辯護，她指請漫畫師前已和出版社傾過，希望漫畫像改編小說多過電影卡通版，而Young的創作靈感亦來自小說，故其影像反而較接近她的想像。

雖然Stephanie擁有漫畫全部話事權，卻沒有作出大更改：「我係有生殺大權，但我好欣賞Young嘅構圖，我只係間中提出少少修改，好似某角色啲髮色應該鬈啲或深色啲，或者張枱應該四方，我都有堅持啲車型號要跟足我寫咁，雖然冇乜人關心。」她又表示完成《吸》小說四部曲後會休息做其他事，但不排除會再執筆創作延續系列。

此外，唱得兩嘴的羅拔打算拍畢《吸》系列後進軍樂壇，Simon Cowell有意簽他做歌手，但他因不想做偶像派而卻步。