闊別舞台4年的徐小鳳，昨日舉行記者會，公布下月在澳門開個唱3場，票價最高更達2,000元，與曾在同場開騷的莎蓮迪安同價！小鳳姐笑言為歌迷攞利是，要準備兩個福袋，更預告有可能以「七彩波波裙」示人：「會考慮吓着呢個經典嘅波波裙，但咩顏色我都着過，或者今次係七彩！（有冇Keep Fit？）身上呢條裙本來啱啱好，依家有空位，證明真係瘦咗！我已開始戒口同戒辣，練歌時間又長，食嘢都唔太吸收！」大會又請來小鳳姐好友薛家燕（好姨）送上大禮，小鳳姐則為好友準備「通行證」，好姨笑言可在場內橫行！