前晚周汶錡（Kathy）出席好友Alice So的越南餐廳開張，為工作不時周圍飛的她，惆悵地透露日前將手袋遺留在的士上：「嗰晚同幾個朋友食完飯一齊搭啲士返屋企，我攞住個好細嘅手袋，朋友送我落車先，我落車時手上攞住幾袋嘢，又攞電話又攞住件褸，都唔知冇攞到個手袋，可能個袋仔跌咗落地下，個袋係黑色，啲朋友又睇唔到，咁就遺留咗！」

搵屋企人打救

Kathy表示當日沒有帶銀包，但帶了兩張信用卡、身份證、鎖匙及幾千元現金：「我第一次咁大懵，可以成個手袋唔見咗，裏面好多嘢唔見都冇所謂，我只係希望有好心人畀番個身份證我！冇身份證好慘，好唔方便，我已經報失咗，但都希望有人執到可以畀番我，我嚟緊又要去北京做嘢，依家惟有拎住Passport同回鄉證先。」

此外，遺失鎖匙亦令Kathy心煩，因有家歸不得，她說：「我當晚好夜先返屋企，一知唔見手袋時已經好心急，去到屋企門口冇鎖匙入屋，變咗Homeless，要即時叫屋企人過嚟幫我開門。」而前晚歐陽妙芝、陳嘉容及黃佩霞等亦有捧Alice場，Kathy表示與Alice相識多年：「我初入行時，佢已經係頂級嘅化妝師，依家仲幫周潤發、鞏俐化妝，佢開餐廳一定要去捧場。」