羽翹（Ava）憑親自製作音樂及教化妝短片，谷爆網絡人氣，榮升新一代YouTube女王，最近人氣更伸延到內地，她希望藉此進軍內地巿場，實行登台搵真銀：「最希望可以搵大錢，照顧屋企人！（唔怕危險？）都有擔心嘅！聽過好多歌手喺內地登台嘅經驗，知道啲觀眾特別熱情，但相信公司接得，一定會安排好保安！」平日愛着高踭鞋出騷的她，自知身形較纖瘦，擔心會被觀眾扯落台，她笑言要為未來「內地之旅」準備特訓：「去之前要搵同事排練吓，練吓手力先！」

羽翹望走唱作人路線，以顯音樂才華。	羽翹唱得又彈得，才貌兼備。	放大圖片

學結他增值

新碟中，Ava親自為新歌《吸血新世紀》填詞，進身唱作女歌手之列，正打算學結他的她，莫非要轉走Rock女路線？她說：「我諗配合番依家嘅路線，會以木結他為主。我本身對Rock唔抗拒，總之凡事靚就得喇！」雖然口邊總掛滿「化妝」及「靚」等字眼，但Ava其實亦唱得、作得兼跳得，更視方大同為學習目標：「我好鍾意方大同，佢行嘅R&B路線好特別，同佢合作係我短期內一個大夢想，希望可以偷師！」

Ava最近忙於進行有關美容的工作，但她不會忘記自己的歌手身份：「雖然啱啱出咗碟，但我最近已收緊新歌，當中快慢都會有。可以嘅話，我希望向難度挑戰，想揀啲有技巧嘅曲風，畀啲新鮮感大家！」

處女碟晒長腿

新人專輯封面通常以「大頭相」掛帥，令觀眾加深印象，不過Ava竟一反傳統，新碟以全身相晒腿作賣點！她說：「都有諗過用大頭相，不過老闆好細心，想長腿吸引到人注意之餘，亦可以簡單話畀人知我嘅路線，所以特登用咗琴鍵做背景！」

出書無懼錯字

曾推出寫真集的Ava透露，正計劃年中再度出書，不過今次她拒絕只賣外表，誓要轉型殺入「才女之路」：「希望可以出一本教化妝嘅書，分享扮靚心得！」問到身為港大畢業生的她，會不會擔心被捉錯字？她即淡定地說：「唔擔心嘅！平日自己都有喺網上寫嘢，咁當然出書字數多咁多，會特別小心啦！」