自從鄺敏慧報警指被崔建邦打傷後，火速上位，密密接Job拍廣告。向來有異性緣的她，更因被打傷事後曝光後，不少男性對她由憐生愛，繼本月初傳出搭上星馬富家子之後，大前晚再被拍得夜會型男，極速搭上20歲新歡「嫩滑版Amigo」Sam Sha，看來中巴對崔建邦這類眉粗、眼細的男士情有獨鍾，感情生活亦相當精彩。

中巴和男模阿Sam夜遊旺角，有講有笑，更不時咬耳仔甜笑。	中巴和阿Sam在街頭漫步，阿Sam更輕鬆得兩手擺動大踏步。	中巴甫見記者拍照即露出驚訝表情，阿Sam更立即收起笑容。

慌失失答非所問

當晚十一時許，中巴一身仔戰衣出動，穿上短裙長Boot出巡旺角，身旁的「嫩滑版Amigo」Sam Sha樣貌與崔建邦有八成相似，同樣是單眼皮，與中巴相當合襯。雖然當時大部分店舖已關門，但兩人卻樂在其中，邊行邊咬耳仔，有講有笑，漫步西洋菜街。

阿Sam立即撇甩中巴，慌張地火速逃離現場。

去年中巴生日，崔建邦送上蛋糕為她慶祝。 資料圖片

當知道被撞破好事後，中巴即慌失失，一臉尷尬地笑，而男方更九秒九彈開，二人隨後不停回頭望有沒有記者跟隨，正當以為記者已離開，轉頭又走在一起，顯得此地無銀，此時記者上前要求拍照，阿Sam再度彈開避鏡頭，留下中巴獨自應付，問她是否與男朋友行街，她說：「啱啱同成班朋友飲嘢。」當問她最近忙甚麼時，她竟無厘頭說：「唔方便講。」

經理人唔夾口供

事後記者致電中巴經理人Frankie，他堅稱二人只是朋友關係，又表示中巴很乖，會向他報告行蹤，絕對冇拍拖：「其實當晚中巴去完會展睇Vivienne Westwood時裝騷，之後約朋友飲嘢，公司一直都知佢行蹤，當晚佢哋三個人去飲嘢，仲有一個女仔，個女仔因為去截的士，你哋咁啱影唔到啫！（個男仔係咪富家子？）絕對唔係，嗰個係虛構人物。」

他又表示阿Sam是旗下公司模特兒：「嗰個係公司同事，中巴冇拍拖，佢自己都唔想拍拖，感情生活一片空白，所有心機擺喺工作上，啱啱接咗個廣告。（對於與崔建邦的官司？）唔方便講。」據知，中巴今日會出席亞視錄影節目，而她在Blog中透露曾去看Vivienne Westwood的時裝騷。

不過，據知阿Sam其實是另一間模特兒公司，與Frankie「口供」有出入，記者致電其所屬模特兒公司Pure models，問到其經理人Sunny知否二人拍拖，他說：「真係唔清楚。（佢哋點識？）以我所知佢哋冇合作過，不過阿Sam喺加拿大返嚟，可能佢個人比較Nice，識得好多Model朋友。（阿Sam有冇喺出面掛單接Job？）佢同我哋有合約，其他事唔方便回應。」