林海峰（Jan）自言與歌神張學友同年入行，對方如今已半退休，但他卻等足廿年才首次衝出香港開騷，上周六假廣州體育館舉行《是但噏X我願意》Talk騷，雖然老婆彭羚及兩個囡囡沒有隨行，卻有一大班粉絲拉隊撐場，加上好兄弟葛民輝（阿葛）擔任表演嘉賓，令他十分感動！

Jan一貫整古做怪，氹掂內地粉絲。	Jan（左二）與阿葛（右一）蝦碌連連，場面爆笑！	Jan跳來跳去，十足大細路！

最驚冇人睇

為打破兩地文化差異，全場字幕都用簡體字，Jan更加插地道潮語，現場笑聲不絕！甫開場，他即載歌載舞搞氣氛，當他唱《求其大合唱》時High爆褲鈕，他即尷尬O嘴：「我又冇電視劇、電影上畫，唔明點解會有廣州觀眾知道我係邊個！日前我嚟睇場地，保安都問我哋邊個係藝人？當時驚冇人睇！」雖然節目流程跟香港站差別不大，但Jan與阿葛仍蝦碌頻頻！

獲阿葛力撐

慶功宴上，Jan死撐爆呔為搞氣氛，對於開騷撞正「勁歌總選」，他暗寸TVB：「台下掌聲好好聽，好過攞亞太男歌星獎，所以我上嚟廣州攞呢個獎！」至於與阿葛蝦碌連場，Jan強調是特色，又表示今次開騷沒有掣肘，阿葛則表示會繼續撐好兄弟。